كتبها لكم /سمير المطيعي
… ذكريات
قديمة من بلادنا
بقلم سمير المطيعي
ايه رايك يا صديقي ببياع الفراخ اللي كان بيجي الساعة 6 الصبح ويرمي القفص الكبير من فوق دماغه علي الرصيف،
القفص مليان فراخ وحمام وبط ووز …. شاله ازاي ؟ ماعرفش!! …
العجيب كل ستات الحتة يخطفوا اللي في القفص يعني في نص ساعة يكون مخلص …
موضوعنا مانتهاش – الراجل بيبيع الطيور بالتقسيط –
تسمع البياع بصوته العالي – الذي يمزق هدوء الصباح
لا مش 3 جنيه – انتي خدتي بطة الجمعة اللي فاتت ب 225 قرش وعليكي قبلها 175 قرش تمن فرخة اتنين كيلو الا ربع ،
تحاول الست تصلح له أو تفاصل ، فيقولها لا انا بقولك
والبطه 3 كيلو و200 جرام يبقي انت عليكي 4 جنية اديني اللي معاكي وهاتي الباقي بعدين وعندك النهاده بطة دي تمنها 3 الا 10 صاغ –
العجيب الراجل كان بيتعامل بالارقام والموازين ويحفظ عشرات الزبونات ، عليهم كام ؟ من غير نوتة ولا قلم –
ناس جبابرة حقيقي .
* نوستالجيا : تعني الحنين الي الماضي ، واستدعاء الذكريات القديمة بمزيج من الحنين المختلط بالحزن والبهجة ، ويظن العلماء انها مفيدة للصحة النفسية.
رأيكم يهمني.
والي لقاء آخر مع نوستالجيا -2-
سمير المطييعي
