بقلم: السيد عيد
بعد أن أتحفنا بإختراعاته فكر فصيح المخترع في تحدي جديد، فقرر أن يخترع نظارة “ذكية” ليست كأي نظارة عادية، بل نظارة تعيد تشكيل رؤيتنا للعالم من حولنا.
النظارة دي ما بتكبرش بس الصورة قدام عينيك، لا.. دي بتفتح لك بوابة لعالم موازي، مليان ألوان وأشكال ما شافهاش حد قبل كده. كائنات غريبة بتتنطط في الهواء، حيوانات ملونة بألوان الطيف، وأشخاص بملابس من كرتون الرسوم المتحركة.
في أول تجربة له، لبس فصيح النظارة بغرض إنه يشوف الحي بشكل أوضح، لكن الحي اللي قدامه كان مشهد كاريكاتوري كوميدي. الناس ماشية كأنها عايشة في فيلم رسوم متحركة، بعضهم بيطير، وبعضهم بيتحول لفقاعات، وعمود الكهرباء في الشارع كان بيرقص على أنغام أغنية
العب يلا .
سعاد، زوجته الصبورة، لاحظت ابتسامة عريضة على وجهه وهو بيتكلم مع الهواء كأنه صديق قديم.
سألته بقلق: “بتشوف إيه بالظبط يا فصيح؟”
رد عليها بحماس: “أنا شايف الدنيا أجمل بكتير… بس كمان شايف عمود الكهرباء بيعمل دبكة في الشارع!”وبيرقص .
الموقف بقى أسوأ لما فصيح بدأ يشك في كل حاجة حواليه. طلع يتمشى في البيت وبدأ يطارد ظلال الحيطان، يضحك على نفسه، ويرد على أصوات ما حدش غيره بيسمعها.
سعاد، اللي كانت بتراقب الموقف بقلق متزايد، حاولت تسحب النظارة منه، لكنه تمسك بيها وقال: “دي مش بس نظارة، دي باب لعالم تاني… بس واضح إن العالم ده جنان!”
ووسط كل الضحك والهلوسة، كانت النظارة تعكس صورة فصيح: مخترع بين عبقرية وجنون، يحاول يفهم حدود الواقع من غير ما يخسر عقله.
قبل ما تخترع نظارة تغيّر رؤيتك، اتأكد إنك مش داخل في فيلم رعب كوميدي… لأن الرؤية أحيانًا ممكن تكون لعنة مش نعمة!
وانتهت بالنظارة اللي بتخليك تشوف الجيران كأنهم كائنات فضائية، قرر فصيح ياخد خطوة “مصيرية”… يرشح نفسه لمجلس النواب!
وقف في نص الحارة، ولبس جاكيت بدلة فوق بيجامة مقلمة، وشال يافطة مكتوب عليها:
“صوتك لفصيح… العلم في خدمة الكرسي!“
قال في أول خطاب جماهيري قال
“أنا مرشحكم المستقل، المخترع، الفيلسوف، صاحب مبدأ ‘جرب وبعدين نندم’! هدفي… أطور الحارة وأركب فيها واي فاي مجاني متوصل بالغسالة.
سعاد، مراته، قالت:
“فصيح ناوي يخترع قانون يخلي كل واحد يفكر بصوت عالي، عشان ماحدش يكذب، بس أنا شايفة إن البرلمان محتاج عاقل، مش واحد بيرى الوزراء على هيئة روبوتات!”
لكن فصيح مُصرّ:
“أنا هيغير السياسة، وهيخلي التصويت بالريموت، والخطب والمناقشات بالبلوتوث،
لو فصيح دخل البرلمان… ابعت ولادك يتعلموا النجارة، أصل اللي جاي كله ترزيه في القوانين!
وغالبا هنحتاج نلبس نظارة فصيح علشان نشوف برلمان قوي وأعضاء تحس بالغلبان .
