إعداد/ رانيا فتحي
لو عايزة تخزني الثوم افضل وقت ليه هو بعد شم النسيم في اواخر شهر ابريل
الفرق بين التوم الابيض والاحمر وطريقة تخزين كل واحد فيهم
التوم الابيض بيسموه التوم البلدي طعمه وريحته اقوى ومينفعش ننشفه ويتخزن ده بيتخزن مفروم فقط فى الفريزر لانه بيفضى بسرعه وعمره قصير …
التوم الاحمر ريحته وطعمه اقل شويه بس عمره طويل وهو ده اللي بيتخزن مجفف في البلكونات وبيقعد من السنه للسنه سليم
طيب ازاي نخزن ده وده … هقولكم على كذا طريقه وانتو اختارو اللي يناسبكم
اولا تخزين الثوم الاحمر ..
الثوم الاحمر نحاول واحنا بنشتريه بقدر الامكان يكون في الجزور بتاعته طين دي حاجه بتساعد انه يعمر في التخزين ونجيبه نفرده كام يوم الاول جمب بعض في البلكونه بعيد عن الشمس المباشره في مكان جيد التهويه لحد ما الساق بتاعته الخضراء دي تجف وطبعا نراعي ان الثوم يكون واقف على راسه والساق بتاعه لفوق
بعد جفافه هنفرزه وننضفه ونجمعه مع بعضه ربطه معقوله كده ونجمعه بقطعه قماش او حبل مع بعض ونعلقه في مكان جيد التهويه بعيد عن الشمس والمطر وطبعا يكون الراس بتاعته لاسفل .. لان ده بيساعد ان السوايل اللي في الساق تنزل لتحت وتساعد في ملو راس الثوم وتبقى كويسه
ملحوظه هامه .. لازم يتفرد الاول زي ما قلت ويجف لواحده قبل تجميعه في ربطه واحده بالشكل ده عشان لو جمعتوه والساق خضراء لسه السيقان بتاعته هتعفن ..
ثانيا بقى التوم الابيض وده الاسهل …
وده اسهل وعملي في تخزينه .. كل اللي هتعملوه هتجيبوه وهو اخضر مايكونش ناشف وتفصصوه بقشره الداخلي ويتفرم في كبه او خلاط لكل كيلو ثوم معلقة صغيرة ملح ومعلقة كبيرة خل ويوضع في برطمانات او أكياس وعلى الفريزر وتطلعوه عند الاستخدام تستخدموا منه وتعينوه تاني . وبرده هيعيش معاكم طول السنه في الفريزر ان شاء الله زي ما هو .. وانا شايفه ان ده عملي اكتر واسرع
