بقلم / سميرة على
..لما تحب…اوعى تحب بزيادة
ولما تهتم… بلاش تهتم بزيادة ..
..يمكن يكون طبعك كده…
سخي في مشاعرك، نضيف في نيتك، وبتدي بإخلاص.
بس في نقطة بتفرق…
لما تدي… مش بتستنى مقابل…
ولا بتستنى كلمة شكر، ولا رد جميل…
كل اللي عايزه…إنك ما تندمش.
ما تندمش إنك فتحت قلبك،
ما تندمش إنك كنت سند لغيرك،
ما تندمش على وقت ولا على طاقة،
أنت إنسان… واللي بيديك طاقة بيخليك تكمل ..
مش الشكر اللي بيمنح الطاقة…
لا ده الإحساس إنك ما كنتش غلطة في حياة حد.
تبقى عايز تقول له..
بلاش ترد الجميل… بس حافظ على صورتي جواك.
ما تحطنيش في موقف يخليني أقول: “يا ريتني ما عملت.”
..الاهتمام مش سلعة…لكن وجع الندم صعب،
صعب على اللي قلبه طيب، ونيته صافية، وبيشوف الدنيا من نضافته مش من سوادها.
فلو لقيت حد بيدي من قلبه…
خلي بالك منه.
مش علشان هو محتاجك،
لكن علشان النوع ده نادر… ولما يختفي، بيروح للأبد.
