197
بقلم إيمان دويدار
مش سؤال والسلام، ده اعتراف صغير بالخوف اللي مستخبي جوا القلب.
عايز أطمن إنك بخير، حتى لو صوتك بيضحك، وحتى لو كلامك كله “تمام”.
عايز أطمن على روحك،
على الجزء اللي ما بيبانش في الصور،
ولا يظهر في الردود السريعة،
ولا يطلع في “أنا كويسة” اللي بتتقال علشان ما حدش يقلق.
والقلب بيستنى كلمة منك
مش حل… كلمة بس تقول: أنا هنا.
عايز أطمن إنك لسه بتضحكي من قلبك،
مش من باب العادة،
إن النوم بييجي من غير تفكير طويل،
وإن قلبك ما بقاش بيشيل أكتر مما يستحمل.
لو تعبانة… قولي.
ولو مش قادرة تشرحي… اسكتي،
وأنا أفهم السكوت.
أنا مش جاي أصلّح،
ولا أدي نصايح،
أنا جاي أطمن،
وجاي أقول إنك مش لوحدك… حتى وإنتِ قوية.
عايز أطمن عليكي،
علشان في ناس وجودهم في حياتنا
بيخلينا نخاف عليهم أكتر
مما نخاف على نفسنا.
