اعرف كليتك : كلية الألسن

0 2 2 دقائق

رانيا فتحي
– كلية الألسن تعتبر حلم كتير من الطلبة اللي بيحبوا اللغات والترجمة.

– تنسيقها بيتراوح تقريبًا بين 82% و90% (علمي وأدبي)، بيختلف حسب الجامعة والسنة.

مدة الدراسة وطبيعتها
– مدة الدراسة 4 سنين.

– أول سنة بتاخد مواد عامة في الترجمة واللغة العربية والدراسات الإنسانية.

– بعد كده بتتعمق في اللغة اللي اخترتها، سواء انجليزي، ألماني، فرنسي، إسباني، صيني، إيطالي، روسي، أو حتى لغات نادرة زي عبري وفارسي وياباني.

نظام الدراسة
– الدراسة كلها تقريبًا لغة التخصص + اللغة العربية.

– يعني مثلًا لو اخترت ألماني، معظم المواد هتكون بالألماني.

– بتدرس ترجمة عامة، تحريرية، فورية، أدب، ثقافة، وتاريخ البلدان دي.

أهم المواد اللي هتدرسها
– ترجمة (عامة – متخصصة – فورية).
– أدب ونقد (أدب انجليزي، فرنسي…الخ).
– قواعد وصوتيات اللغة.
– ثقافة وحضارة وتاريخ الدول.
– لغة عربية مكثفة عشان الترجمة.

التخصصات والشعب
– شعبة انجليزي (أشهرهم وأوسعهم).
– شعبة فرنسي، ألماني، إيطالي، إسباني.
– شعبة صيني، ياباني، روسي.
– شعبة عبري، فارسي، تركي.
– اختيارك بيكون حسب رغبتك ومجموعك في أولى.

مميزاتها
– بتطلع منها متقن لغة أو أكتر، وده بيفتحلك أبواب شغل كتير.

– فرص السفر برا مصر كويسة جدًا سواء منح أو شغل.

– تقدر تشتغل مدرس لغة (سواء انجليزي أو فرنساوي أو غيرهم) وعلى حسب تميزك ممكن تعمل فلوس حلوة من الدروس الخصوصية.

– سوق الترجمة كبير سواء شركات أو فريلانس من البيت.

– لو طورت نفسك تكنولوجيًا مع الترجمة ممكن تشتغل في Localization أو AI Language Data.

عيوبها
– محتاجة واحد بيحب اللغات فعلًا ومستعد يقرا كتير جدًا.

– المرتبات كبداية مش عالية زي الطب والهندسة، إلا لو دخلت مجال الشركات العالمية أو الترجمة المعتمدة أو إشتغلت مدرس.

مين تنفع له ومين ما تنفعش؟
– تنفع للناس اللي بتحب اللغات والثقافات والقراءة.

– للي مش بيزهق من القعدة بالساعات على قاموس وترجمة نصوص.

– ما تنفعش للي دماغه مش مع الحفظ والقراءة وتحليل النصوص أو مش بيحب يتعامل مع ناس من ثقافات تانية.

مجموعك ما جابهاش؟
– ممكن تدخل كلية تربية قسم لغة أو آداب لغة وتكمل بنفس الطريق.

– أو تدرس لغتك المفضلة في معهد خاص زي معاهد اللغات العليا.