لكل الاطفال خلِّي بالك من نفسك في المدرسة!

محمد غريب الشهاوي 

المدرسة مكان مهم بنتعلم فيه ونلعب ونقابل أصحابنا. لكن زي أي مكان، لازم نكون دايمًا واخدين بالنا من نفسنا ومن اللي حوالينا. علشان كده، لازم نعرف شوية حاجات تحمينا من أي تصرف غلط ممكن يحصل من أي حد، سواء كبير أو صغير.

1. جسمك ملكك إنت وبس!

مافيش حد من حقه يلمسك لمسة تزعجك أو تخليك تحس بالخوف أو الضيق. لو حد حاول يعمل كده، لازم تقول “لا” بصوت قوي، وتروح تحكي لحد كبير بتثق فيه زي ماما، بابا، أو المُدرسة.

2. الكلام الغريب مش عادي

لو حد قالك كلام غريب أو خلىّك تشوف حاجات مش مفروض تشوفها، ده تصرف غلط، ولازم تبلغي عنه فورًا. أنت مش غلطان، اللي غلط هو اللي عمل كده.

3. ما تروحش مع حد لوحدك

لو حد طلب منك تروح معاه في مكان بعيد أو لوحدكم، حتى لو قال إنه يعرف ماما أو بابا، لازم ترفض وتروح تبلغ حد كبير في المدرسة.

4. إحكي ومتخافش

لو حصل حاجة مضايقاك، إحكي، متخافش، ومش عيب أبدًا تحكي. ده معناه إنك شجاع وشاطر. الكبار موجودين علشان يساعدوك ويحموك.

5. خليك دايمًا وسط أصحابك

حاول تكون دايمًا مع أصحابك، وبلاش تروح أماكن بعيدة لوحدك، خصوصًا الأماكن اللي مافيهاش ناس 

وفي النهاية:

أنت غالي ومهم، وجسمك وحياتك لازم تكون في أمان دايمًا. لو أي حاجة خلتك تحس بالخوف أو عدم الراحة، احكي لحد كبير بتثق فيه فورًا. إحنا بنحبك وبنخاف عليك!

احمي نفسك واتصل علي الرقم الموحد 16000 حمايه الاطفال